O secretario xeral de Emigración, Manuel Luís Rodríguez, anunciou hoxe que o Servizo Público de Emprego Estatal vén de aprobar, a proposta do Goberno galego, a creación profesional da figura do mediador intercultural e a súa inclusión nos diversos servizos públicos de emprego das autonomías. A proposta aprobouse por unanimidade de toda as comunidades autónomas e en base a un amplo estudo realizado no marco do proxecto da iniciativa comunitaria Equal “Convive+”, que lidera a Secretaría Xeral de Emigración. A figura do mediador xa estaba estendida na práctica con distintas denominacións, traballando en diferentes institucións públicas e privadas do Estado, pero ata o de agora non estaba recoñecida como ocupación a efectos dos servizos públicos de emprego.

A nova ocupación conterá de funcións asociadas á intervención social en contextos multiculturais para potenciar a comunicación entre culturas e a convivencia intercultural e para previr, resolver, reformular políticas en situación de convivencia de diversas culturas nun mesmo territorio. Entre estas funcións están a intermediación e interpretación dos códigos socio-lingüísticos e culturais dos actores sociais, en especial das persoas inmigrantes; desenvolver políticas para a prevención e resolución de conflitos interculturales; e mediar na negociación e consecución de acordos contractuais para as partes en litixio en situación de conflito social.

As súas funcións poderán desenvolverse nas áreas de intervención social ou de atención ao cidadán nos eidos dos servizos sociais, sanidade, educación, xustiza, emprego, etc. en entidades tanto públicas como da iniciativa privada, como entidades prestadoras de servizos, asociacións de inmigrantes, sindicatos, etc.

O responsable de Emigración, que fixo este anuncio durante a inauguración das xornadas “Migracións, Progreso e Interculturalidade”, subliñou que nos próximos anos dous son os retos para dar resposta axeitada ao fenómeno da inmigración. Por unha parte, dispor de políticas adecuadas de integración, e por outra, aproveitar as oportunidades de desenvolvemento que habilita a emigración fronte aos seus custes, é dicir, fronte á desigualdade que provoca.

Diversidade e pluralismo
A diversidade e o pluralismo convertéronse xa en características estruturais da nosa sociedade, que ten no intercambio e na mobilidade das persoas e os seus modelos culturais dous factores claves do seu progreso futuro. Baixo este escenario, sinalou Manuel Luís Rodríguez, é preciso construír unha ideoloxía positiva do que significa e achega o diferente nas vivencias e coñecementos habituais, fomentar a integración real fronte á segregación, estimular condutas e culturas diferentes e a súa difusión e coñecemento, e fomentar a comunicación e a convivencia intercultural, dende o enriquecemento mutuo sen ter que rexeitar o propio.

As formas de propiciar este escenario son múltiples, pero sempre vividas dende os principios comúns do respecto, o recoñecemento, e a garantía dos dereitos como motor do proceso de acomodación da poboación inmigrante na sociedade galega, asegurou.