A solicitude española foi examinada onte por primeira vez no ámbito de embaixadores, xunto coa demanda de Irlanda de que se recoñeza o gaélico como lingua oficial (é un caso distinto ao ser lingua oficial do estado irlandés. Ningún estado membro se opuxo frontalmente a esta solicitude, pero si que houbo preguntas dos embaixadores sobre como ía funcionar o recoñecemento destas linguas, a súa presenza no Diario Oficial das Comunidades Europeas ou o seu custo económico.

Custos

A Comisión Europea ten o encargo de examinar o custo económico que tería o recoñecemento destas linguas. Irlanda prevé que traducir ao gaélico a lexislación principal da UE ascenderá a medio millón de euros ao ano. Tamén solicitaron máis aclaracións sobre os aspectos xurídicos. O memorándum presentado polo Goberno español o mes pasado de decembro reclama que todas as linguas rexionais españolas sexan "oficiais e de traballo" na UE.

España farase cargo de todos os "gastos administrativos" que xere nas institucións da UE o uso destas linguas, e proporcionará tradutores e intérpretes como "expertos nacionais destacados". Irlanda quere promover o uso na UE do gaélico, que na actualidade está recoñecido como lingua de Tratado.

Cos novos países, as linguas oficiais pasaron a ser 20: alemán, dinamarqués, español, finlandés, francés, grego, inglés, italiano, holandés, portugués, sueco, polaco, checo, eslovaco, esloveno, estonio, húngaro, letón, lituano e maltés.

Previsión de usos

Os cidadáns poderían dirixirse ás institucións comunitarias na súa lingua e terían dereito a recibir resposta nelas. As linguas cooficiais utilizaríanse nos plenos do Comité das Rexións, a Eurocámara e se é o caso o Consello, sempre que se solicite cunha antelación de 7 días hábiles.

Ademais, o Goberno reclama á UE a publicación dos textos finais adoptados por procedemento de codecisión entre o Consello e o Parlamento.